多年嚟一直被視為特首黑馬嘅田北俊，尋日謙稱自己無能力競選特首，佢直指按當前香港嘅政制架構同政治形勢，特首呢個位根本做唔過，唔好話要理順行政立法關係，隨時連三司十二局埋班都成問題。

田少尋日上網上電台節目，客串主持劉慧卿問田少，會唔會競選特首，田少反問：「你覺得做得過咩？」田少分析，香港特首依家唔可以擁有政黨背景，政治上嘅活動空間狹小，喺立法會固然無票，施政困難，就連管治班子裏面都欠缺後盾；加上特首每五至十年輪替一次，外間根本無人願意出任「短命」司局長，試問咁嘅特首位置，坐唔坐得過呀？

田少仲話，已經將呢個困局如實向中央表達，中央點睇，會唔會針對情況作出改革，就唔知嘞。

田少早前一句「幹部治港」，一話激起千層浪，搞到疑似特首候選人之一嘅行政會議召集人梁振英（CY）好唔得閒。田少尋日澄清，話無具名提過CY個名，亦唔覺得CY係幹部，佢用「幹部」一詞，只係籠統泛指「同中央關係好好」嘅人，並非真係共產黨員。

仍想3L回巢

田少唔恨做特首，自由黨常委喺佢眼中一樣輕如鴻毛。自由黨常委報名尋日截止，出現二十七人嘅等額報名名單，全部自動當選，田少不在榜上，反而莎莎國際老闆郭少明「升呢」，由中委變常委，其餘仲有四副新面孔，好似自由黨港島同九龍西支部主席邵家輝同何顯明咁；不再競逐連任常委嘅，就有早前兼任經濟動力成員嘅工業總會主席孫啟烈。

田少話，常委要每個月開會，佢出任中委最適合，至於黨嘅去向，佢話，仍然希望退黨創立經濟動力嘅林健鋒、梁君彥同梁劉柔芬回巢，又斬釘截鐵指，新論壇龐愛蘭至今無加入自由黨，但政治永不說永不，睇完二○一一年自由黨區議會選舉嘅成績再算。