莘莘學子放咗個悠長暑假，尋日終於開學。科大及理大有新校長駕到，開學禮備受矚目。科大新校長陳繁昌「新官上任三把火」，食住前校長朱經武嘅餘威，開宗明義要求政府泵多啲水發展科研；理大校長唐偉章就打晒親民牌，學新生一樣戴上歡迎手帶，夠晒「潮」！
卓妮尋日走勻兩大院校嘅「開學騷」，陳繁昌初試啼聲主禮，致完辭後切埋燒豬請大家食。陳校長學足朱經武一樣，作風敢言，講起金融海嘯下籌款有否壓力，佢好率直咁話，前日才正式踏足校園，仲未睇晒盤數，但以佢所知，美國啲大學籌得嘅科研基金唔單止冇因為金融海嘯下跌，反而逆市增加五成，反映美國人明白科技發展係需要長期投資喎。
美國人荷包缺水都掟錢搞科研，咁香港又點呢？梗係羞家喇。陳繁昌兜咁大個圈講古仔，無非係想話畀政府知，香港再唔重視科研發展，只有死路一條。
轟政府目光短淺
查實朱經武臨離開科大前亦曾炮轟港府只重金融，忽視科研，目光短淺，依家輪到繼任人陳繁昌進諫，睇嚟情況確係幾嚴峻。
理大校長唐偉章冇講有冇籌款壓力，不過佢自爆暑期放咗一星期假返美國維珍尼亞州探望仔女，順便去華盛頓聽咗前「披頭四」成員保羅麥卡尼（Paul McCartney）演唱會，點知怕醜唔敢衝去台前問偶像攞簽名，認真可惜。
唐偉章愛披頭四
原來唐校長六十年代讀緊小學時已經係「披頭四」迷，可惜家境清貧，連收音機都買唔起，直至八十年代大學畢業後出嚟打工，先至擁有第一張「披頭四」唱片，至今已集齊樂隊所有唱碟。
新學年到，為人師表最怕見到學生哥走歪路，學人吸毒或者援交，唐校長話，作為教育工作者，當然唔想見到學生誤入歧途，不過講到有冇需要喺理大引入自願驗毒計劃，佢話大學生思想較成熟，唔似中學生咁易受人影響，所以唔擔心吸毒風氣會蔓延大學校園喎。
卓妮