食環署現於全港街道分別放置約二千二百個懸掛式及五百個坐地式煙蒂箱，共耗資約一百二十萬元。不過，陳先生卻稱，竹園街市對出斑馬線位置原放置垃圾箱，自改為擺放煙蒂箱後，垃圾桶被搬至較遠位置，不少市民為貪方便，經常隨手將煙蒂箱當作垃圾箱使用，箱頂不但滿布垃圾，地上更遍布自箱頂掉下的垃圾，衞生情況惡劣，「食煙嗰啲用唔到個箱，想丟垃圾嘅人又冇位丟，結果搞到一地垃圾。」

煙蒂箱未能發揮應有功能的同時，更被發現嚴重錯配。樂富居民黃先生發現，一間便利店對出欄杆「離奇」地同時放置懸掛式及坐地式煙蒂箱，認為有「嘥料」之嫌，「點解要兩個放埋一齊？隔籬條欄杆又一個都冇？」

議員促檢討分布

在大埔鄉事會街，沿途則放置六個設有煙灰缸的垃圾箱及兩個懸掛式煙蒂箱，李先生直指數量過多，「隔幾步路一個，好似誇張咗啲，搞到好似政府有好多嘢用唔晒咁！」

立法會衞生事務委員會委員陳克勤認為，食環署有必要檢討煙蒂箱的分布、擺放位置，並聯同控煙辦檢視成效，避免煙蒂箱淪為垃圾工具，失去原設效用。

「啲人唔鍾意有個垃圾桶喺食肆門口或者側邊，擺煙蒂箱會適合啲，如果可以適當咁調整吓，就更加可以物盡其用。」立法會食物安全及環境衞生事務委員會委員王國興亦建議當局，須因應實際情況調整擺放位置，改善使用情況。

竹園街市對開斑馬線兩旁分別放置坐地及懸掛式煙蒂箱（紅圈示），被指擺放有誤。

蘇先生「掛喺度嗰隻設計唔係咁好，個窿太細，好難放到支煙頭落去，都係有煙灰缸嘅垃圾桶仲方便啲！」

驟眼誤當老鼠箱

香港知專設計學院設計系高級講師陳光耀表示，公眾設施的設計需考慮多個因素，如設施能否發揮應有功效、外觀能否傳遞設施用途等。除設計外，擺放位置及宣傳亦有助市民正確使用設施，「掛喺度嘅煙蒂箱，驟眼睇好易誤會係老鼠箱或者信箱，再加上掛嘅地方唔顯眼就好難吸引到人用。」

就煙蒂箱位置擺放不當的指摘，食環署發言人未有正面回應，僅表示煙蒂箱主要擺放較多吸煙人士途經或逗留地方，該署亦會按街道情況決定煙蒂箱的位置、數目及類型。

記者 莫麗珊