正所謂相愛容易相處難，喺依家呢個時代，有幾多對夫妻可以同偕白首相敬如賓之餘，仲要繼續恩愛呀！？所以李業廣同太太呢對夫妻，真係好值得人羨慕。點解咁講？早幾日李業廣（Charles）喺中環同朋友飲茶，佢係股壇教父，呢排個市有番啲起色，梗係要問吓佢對後市點睇，不過呢位港交所前主席對於個大巿走向似乎提唔起興趣，只係冷冷淡淡咁話︰「我無睇個巿呀！因為我退咗休啦！」
不過一講起佢同太太坐郵輪再度蜜月，佢又即時生猛晒咁話︰「我哋啱啱坐完船返嚟啦，今次去咗三個星期，去地中海同歐洲幾個地方玩，真係好Sweet，太太都好滿意個旅程。」見Charles講到眉飛色舞，好明顯佢哋呢個Trip一定玩得好開心。
Charles今年七十三歲，佢已經喺好多個公職嘅位置上退落嚟，現時最重要嘅公職就係行政會議成員，依家掛名叫做係「退休人士」，以前Work得咁Hard，依家有機會休息吓，同太太享受人生，係最緊要嘅。