堂堂局長開到聲，以為下面班醫護人員一定會打醒十二分精神，神遊太虛嘅馬上專心做嘢，懶懶閒嘅立即轉死性變晒有承擔啦，點知結果啱啱相反。

呢，話口未完，公立醫院又接連爆多兩單杰撻撻嘅醫療事故。先有北區醫院癌症女病人被醫護人員錯誤將口服嗎啡當鹽水注射，七日後不幸死亡；跟手再有沙田威爾斯親王醫院護士冇核對嬰兒手帶資料，錯誤幫一名嬰兒注射另一名嬰兒嘅抗生素，真係鑊鑊新鮮鑊鑊甘。

打錯針已經夠晒離譜，最弊係醫管局成日心存僥倖，以為可以瞞天過海，唔係畀傳媒踢爆都唔想公開。好似話聯合醫院發生咗單離奇死亡事件，一名配藥員喺藥房自殺死亡，懷疑死控工作壓力大及不公平管理，但院方神神秘秘，冇對外公布事件，好難唔令人懷疑裏面另有內情。

話說回頭，講番北區醫院嗰單，今次周一嶽醒水扮隱形，只有食衞局副局長梁卓偉出嚟受靶。正所謂上樑不正下樑歪，呢個梁卓偉都係一擔擔，淨係識講埋啲阿媽係女人嘅廢話，佢話喎，今次事件表面上有人為疏忽，管理層一定有責任，要等到事故有結論至按程序處理受影響嘅員工。

其實，唔使梁卓偉講，係人都知，針都可以打錯，擺明就係人為疏忽啦，唔通係支針自己拮落病人身體，再自動注射咁恐怖？既然有人疏忽，就好應該查明真相，向犯錯嘅員工及管理層問責。

之不過，醫療事故長爆長有，莫講話冇管理層要因此落台，以今次為例，院方聲稱病人離世同打錯針無關，只係訓斥兩名護士就算，咁點令市民信服吖？冇計啦，睇吓周一嶽成身都係鑊，仲可以拎埋個荷蘭水蓋，可見所謂問責呢家嘢，連三歲細路仔都唔信啦！

事實上，近日接連爆發兩單打錯針事件，只不過係冰山一角，曾經有個患血癌嘅少女喺威爾斯親王醫院留醫期間，因為打錯化療針而香消玉殞，真係聞者傷心，聽者流淚呀。

弊在呢班高官次次衰咗都話會檢討以及改善，但改嚟改去，咪又係得個吉。查實醫管局一早已經有套簡稱「三核五對」嘅核對藥物程序，理論上可以確保病人唔會食錯藥或打錯針，但點解藥物事故爆完又爆呢？

嘥氣啦，指引係死嘅，人係生嘅！如果管理層渾渾噩噩，如果醫護人員唔肯跟指引做，就算再搞多個「三十核五十對」又有乜用吖？

公立醫院嘅醫療事故多到數唔晒，輸錯血、割錯乳房，真係講都唔信。計功夫茶話齋，真正原因可能只得一個，就係當局想病人對公立醫院望而卻步，咁樣既可以減輕公共醫療負擔，又可以逼人去私家醫院求醫，帶旺醫療優勢產業。呢個周一嶽，真係用心良苦！