真係唔講都唔知，機電署啲員工，個個有菩薩心腸，位位都係聖誕老人，不是嗎？二○○五年至○八年期間，機電署每年有約一萬五千宗逾期交證明書的個案，四年來只發出兩次通知書及一次禁止使用升降機通知書，咁鬼節約用紙，邱騰華好應該推選佢哋為「環保之星」！

不過，呢個部門嘅有關員工得獎之餘，千祈千祈千祈唔好忘記合力演齣港版《烏龍院》，皆因佢哋錯發嘅烏龍信，原來多過警告信！咁睇嚟，申訴專員對呢個部門的八字狠批，都算手下留情，換了老朽，會批：「遊戲人間，虛擬執法」！看官，機電署有關員工是執「法」嗎？

申訴專員據云給予十三項改善建議，機電署話「接納」，你話管治幾簡單！老朽雖齒搖搖而髮蒼蒼，今後，住十八摟Ｃ座的我，會堅持行樓梯，這總比玩「笨豬跳」來得安全些吧？

特區政府施政無方，管治無效，皆因未能發揮韓非所說的「法不阿貴，繩不繞曲。法之所加，智者弗能辭，勇者弗敢爭。」意即法令不偏袒權貴，有規有矩不選擇性執法；做到法令該制裁的，智者不能逃避，勇者不敢抗爭。所謂「強政勵治」並非樣樣要強出頭，按規律辦事，揚善懲奸，太平矣！