小霍唔怕門票滯銷

蔡菜子話同媽媽、朋友一行六人去日本自駕遊，喺四國同九州玩咗兩星期，尋日先啱啱落機，特登就時間嚟支持東亞運。蔡菜子雖然人在日本，但日日都上網留意香港新聞，佢話喺金紫荊做終點站梗係好過將軍澳啦，對市民同嘉賓都方便啲。不過佢都話尋日比較冷清，政界人士真係少啲，覺得好可惜。

一手湊大東亞運嘅港協暨奧委會會長霍震霆就話，由籌備至今已經三年多，感觸良多，但尋日氣氛麻麻，卓妮問佢可擔心啲門票滯銷？小霍就話香港人比較慢熱，應該會慢慢升溫，仲透露國家已經話會派最強嘅團隊來港參賽，唔少金牌運動員會來港參賽，佢反而話座位唔多，排球、跳水呢啲熱門項目可能會好快滿座喎。問到未來新抱、跳水公主郭晶晶會唔會來港參賽，小霍笑笑口話佢係國家運動員，要問番國家體委先得喎。既然國家咁重視，又點少得郭晶晶呢？

卓妮