本文重點
咩叫真兄弟？香港青年聯會主席陳仲尼（Rock）同副主席霍啟剛尋日親身示範咗畀卓妮睇。話說尋日青聯另一位副主席、觀瀾湖高球會太子爺朱鼎健（Ken）為東亞運傳火炬，阿Rock同成班青聯兄弟姊妹齊齊自發性早咗成個鐘去尖東Stand by，等阿Ken傳火炬，仲拉晒橫額舉晒牌咁。到阿Ken跑過時，佢哋一齊沿途跟住跑兼吶喊助威，相當支持。尋日氣溫有三十幾度，早成個鐘喺條街度「焗」住等，汗流浹背都無計，呢啲兄弟情真係在心中，難怪阿Ken跑完之後，隔住石壆大聲多謝班好兄弟姊妹嘅支持！
晶晶升呢做「阿嫂」
至於同為青聯副主席嘅霍啟剛，就因為要去文化中心出席火炬接力跑開幕禮，分唔到身過尖東，但為咗支持兄弟，佢同細佬啟山專程早啲去九龍公園嘅集合場地支持阿Ken，認真唔話得！見佢哋成班兄弟感情咁好，證明佢哋話對青聯有歸屬感絕非「吹水」。
東亞運進入百日倒數，阿Rock話到時會同班兄弟一齊去睇，但要問啟剛攞飛先。問佢最想睇咩項目，阿Rock未出聲，有「兄弟」就搶答︰「梗係睇跳水啦，要支持未來副主席夫人吖嘛！」連兄弟都咁支持啟剛女友郭晶晶，睇嚟「阿嫂」已經成功過咗「兄弟關」，啟剛果然有眼光！
講番「男主角」阿Ken，佢一早換好東亞運指定服裝去九龍公園集合，不過就相當「衣不稱身」，事關佢嘅身形超級健碩，着到件「指定服裝」好似貼身衫咁，搞到佢有啲尷尬咁話︰「呢件已經係最大Size，我都唔想着到咁貼。」日日做掌上壓、兼且北京奧運時做過火炬手嘅阿Ken，今次可謂駕輕就熟，跑一百米對佢嚟講濕濕碎，仲講笑話，心跳都應該未加速就跑完。有晒經驗嘅佢仲同卓妮講咗個小秘密，就係跑前要「脫水」，事關上次喺長城傳火炬要等成兩個半鐘，冇得去廁所，不過話晒係世紀盛事，等吓都值得。
卓妮