一百八十幾名港區全國政協委員之中，尋日有約八十人出席諮詢會，政協想發問，要先報名再抽籤，最後幸運兒得十幾個，連大孖沙郭炳湘都落空。諮詢會為時個半鐘，政協隨即鳥獸散，肯開金口亦語調溫和，好似容永棋話想港府強化原有四大經濟支柱產業，王䓪鳴希望港府增加大學學額咁，就連汪阿姐尋日亦收晒火，只係要求政府利用舊廠廈幫文藝團體解決場地不足問題。

大家如果以為煲呔曾就此過骨，咁就大錯特錯。據與會者講，煲呔曾喺開場白開宗明義，政改諮詢文件喺施政報告之後公布，希望大家尋日集中就六大產業發表意見，以為呢啲畀面派對，安安穩穩坐到時間夠就收工，點知羅祥國就殺煲呔曾一個措手不及。

本身係香港政策研究所首席經濟顧問嘅羅祥國即場發炮，指六大產業屬產業經濟政策，外國推行產業經濟，必先定下三大指標，評估對就業、稅收同ＧＤＰ嘅影響，有咗量化數據，先至可以制訂相應配套措施，好似投入幾多資源同人才培訓方向咁，但港府話要發展六大產業已經幾個月，竟然提都唔提，簡直不可思議！羅祥國叫煲呔曾「交數」，但煲呔曾聲都唔聲，唔知係咪畀羅祥國嘅突襲嚇窒。有政協講笑話，羅祥國咁勇，真係幫政協爭番啖氣。

我哋打電話問羅祥國，佢直言唔睇好六大產業，質疑今時今日嘅香港經濟格局，同十年前無分別，六大產業最終淪為中藥港同鮮花港翻版，建議港府三思而後行。羅祥國證實，煲呔曾會上無回應佢嘅提問。

搵副局政助落區擋箭

講開施政報告，今年煲呔曾玩變陣，取消自己落幾個大區主持大型諮詢會，取而代之由七名副局長及一眾政治助理做爛頭蟀，在施政報告發表前夕落全港十八區諮詢市民意見。煲呔曾過去一年嘅施政劣迹斑斑，加上日前預告來年無糖派，呢班爛頭蟀落到區肯定成為市民宣洩不滿嘅出氣袋，收料摸底之餘仲做埋箭靶擋箭護主，煲呔曾呢招認真夠毒！