等功夫茶講個離奇古仔畀大家聽，包保你聽到Ｏ嘴。有人盜竊東方報業集團獨家照片，侵犯知識產權，東方梗係第一時間報警啦。奇就奇在，差人冇反應喎，完全冇出動捉賊。過咗一段時間，東方施展霹靂無敵擒拿手，好似捉雞仔咁樣捉住賊仔，梗係再次第一時間報警啦。更加匪夷所思嘅係，差人仍然冇反應喎。你話呢個古仔係咪離奇到聞所未聞先？

成件事係咁嘅，○五年三月十五日，有單譚姓一家四口食咗毒帶子不適送院嘅新聞，其中一張刊登於《東方日報》頭版嘅獨家照片，同日竟被《蘋果日報》及其網站、《成報》及其網站、《星島日報》及其網站以及《東周刊》盜用。東方即刻向涉案傳媒機構以及相關記者採取法律行動，同時又向警方、海關等執法部門舉報。由於執法部門遲遲冇行動，東方為咗討回公道，自費百幾萬元律師費，向涉案傳媒機構以及擅自盜取並外洩照片嘅記者提出民事訴訟。喺鐵證如山之下，包括《蘋果日報》在內嘅有關傳媒一早向東方賠償求和，而涉案記者高潤添，亦被法庭判處敗訴，需向東方賠償。

關於記者高潤添被索償嗰單案，法官嘅書面判詞話：「被告人的供詞前後矛盾，故此根據本席席前的證供，唯一不可抗拒的推論是被告人將這張相片發放出去。」

呢嗱，法官一錘定音，被告無所遁形，換句說話講，即係盜相及侵權嘅賊仔捉到正，有乜理由執法部門仲唔做嘢？有乜理由繼續扮盲？大家千祈唔好忘記，東方今次係透過民事訴訟討回公道，至於刑事檢控呢家嘢，要政府先至可以啟動。

成件事其實好簡單，有人盜相並侵權，證據確鑿，只要執法部門派人調查嗰幾間涉案嘅傳媒機構，就好容易知道邊個盜相、邊個侵權，亦好容易對相關人士提出刑事檢控。可惜，雖然受害人東方願意提供所有資料，亦願意做好市民同當局合作，但執法部門一於闊佬懶理。

古仔講到呢度，大家有乜感想？盜相及侵權案事隔四年有多，受害人自己捉住賊仔，執法者竟然無動於衷，政府成日話保護知識產權，原來係山草藥，噏得就噏。

東方就話有實力同埋耐力打官司啫，係咪個個小市民都畀得起百幾萬律師費呢？小市民被盜竊或者創作人被侵權又點算呀？計功夫茶話齋，前排當局咪成立咗一個「創意香港辦公室」嘅，又話要推動創意產業，又話要打造創意之都，呃鬼咩。政府完全冇誠意保護知識產權，任由賊佬侵犯版權，邊個創意無限，邊個受害最深，傻瓜先至同你搞創作。

立法會議員陳克勤就講得啱，就算已經進行民事訴訟，政府部門亦唔應該翹埋雙手，乜都唔做，咁樣對投訴人唔公平。再講，案件中外洩嘅係一幅獨家照片，過程中好可能涉及利益關係，執法部門應該介入調查！

唉，同人唔同命，當局選擇性執法，壹淫媒利用種種卑劣手法侵犯東方版權Ｎ咁多次，從來冇一次重罰。最離譜嗰單係當年壹淫媒旗下報刊盜用東方擁有嘅王菲懷孕搭飛機獨家相，執法部門又係唔理，東方惟有自費提出民事訴訟。結果東方明明勝訴，但法官居然掉轉頭懲罰東方，要替敗訴嘅壹淫媒埋單畀堂費，東方上訴到終審法院至討回公道。

仲有吖，自稱「香港拉登」嘅馬照聲喺超市食品落毒，要求董建華落台，東方盡好市民責任向警方舉報，並協助警方將馬照聲繩之以法。點知馬照聲懷恨在心，坐完監後採取連串報復行動，對東方滋擾、抹黑、恐嚇，無所不用其極，執法部門同樣裝聾作啞，袖手旁觀，東方又要自己花費巨額律師費向馬照聲提出民事訴訟。

一次係咁，兩次係咁，三次又係咁，執法部門次次扮盲，仲吹水話香港係法治社會，簡直笑死人。算罷啦，香港搞乜鬼創意之都吖，不如成立一個「侵權香港辦公室」，名正言順縱容賊仔盜竊及侵權，咁咪乜都唔使煩囉，執法者打正旗號扮盲，翹埋雙手做大食懶！