22/08/2009

播放本新聞相關短片

男色誘惑:床上性鬥士玄來有樣睇

論性能力嘅強弱,年輕人當然佔優,但大家也不要忘記,坊間有唔少係「打壞後生」,自小體弱多病,弱不禁風。要知道一個男人嘅性能力有幾強,原來喺相學上面係可以搵到蛛絲馬迹,今日就搵嚟梁瑋鈞師傅,為大家揭開真正「性鬥士」之謎。

眉粗黑且潤

據梁師傅講,一個男人嘅性能力強弱,有七成係靠天生,所謂藏於內、形於外,外在面相自然會反映一個人嘅性能力。而天生「最強性鬥士」嘅面相,要符合以下幾個條件,首先要睇睇條眉,如果眉毛生得濃密,咁就有機會成為「最強性鬥士」。

據梁師傅講,眉毛濃密得嚟要烏黑而有光澤,咁代表呢個人體力充沛、性慾旺盛,而且持久力強,係一個長時間作戰嘅高手,一定唔會令女友失望。此外,如果眉骨隆起,同樣表示性能力強悍,因此需索甚大,是每一晚都要戰鬥嘅好戰型分子。

另外,眼尾奸門至太陽穴嘅位置,如果微微隆起或者呈現紅暈,呢種人三妻四妾都應付自如,如果只得一個女友或者太太,一定令對方徹底滿足,只怕到時女方吃不消而矣。如果眼睛部分有呢幾樣特徵,相信已經係難得嘅「最強性鬥士」。

鼻頭要有肉

如果體力旺盛、持久力強嘅猛男都唔啱你嘅心水,想要一啲天生異稟嘅「性鬥士」,梁師傅話男性嘅性器有幾厲害,主要睇個鼻,如果鼻樑又高又長又直,咁性器長度方面,一定冇問題,如果想知粗壯程度方面又應該點睇呢?

梁師傅指出,要睇鼻頭同埋鼻翼,如果鼻頭有肉飽滿,脹卜卜咁樣,加埋鼻翼,即係金甲嘅位置,都係闊大有肉,咁呢位男士一定係天生異稟,性器又粗又壯,令女性折腰。但如果有紋侵痣破,就會大打折扣,另外,仲要有光澤,咁先至係正貨。

除咗睇個鼻哥,鼻頭下面嘅人中位置,亦十分重要,相書話人中同樣可以展示性能力和性器嘅大小,以輪廓分明,冇紋侵痣破表示最好,但據梁師傅講,人中是一個人性心理嘅反映,如果人中輪廓明顯,就係指呢個人對性有好強烈嘅期望同要求。

牙齒要齊整

最後要睇嘅係把口,有肉冇肉,唇厚唇薄都冇關係,最緊要係睇佢合埋嘴時,嘴角係咪自然向上,即係時刻都保持住笑容嘅樣子,如果嘴角向上微翹嘅話,表示你很懂得享受生活,除咗衣食住行之外,連平時嘅性生活,你也會很懂得去細味享受。

另外牙齒要生得整齊,加上門牙夠大且白,咁就完美,因為牙齒齊整係代表其人熱情、開朗、樂觀,充滿陽光氣息,試問一個咁強戰鬥力嘅人,如果充滿負面思想,長期處於幽陰狀態,後果唔係變成非禮犯,就係強姦犯,所以牙齒整齊,十分重要。門牙就代表聰明及體力,如果門牙大而白,就是代表性能力特強,而且充滿床上智慧,喺床上面不斷會令伴侶喜出望外。

總結以上各點,男士擁有當中幾點都已經不得了,有齊晒嘅話,一定係史上最完美嘅性鬥士,不妨留意身邊有冇咁嘅人。

撰文:娟娟

鳴謝:玄學家梁瑋鈞師傅