市區重建局近年多復修保育舊樓，少拆樓重建，畀人話不務正業，發展局局長林鄭月娥尋日出席市建局活動，亦都打趣說市建局「不務正業」，搞埋教育嗰瓣，原來係市建局出咗教材套，講市區更新，教材套已經送畀全港中小學用作通識科同常識科。
市建局新開咗間市區更新探知館，請了林鄭主持開幕禮，林鄭致辭時一開口就賣花讚花香，話市建局參與埋教育，出教材套，值得讚賞，仲主動幫市建局平反，指雖然有人話市建局不務正業，但強調市區更新唔單止係經濟課題，仲係社會性課題，值得年輕人討論。
講番市區更新探知館，最有趣嘅地方係用實景搭出籠屋、板間房，將舊區居民生活呈現出嚟，栩栩如生，連老鼠、曱甴都有，不過呢啲蛇蟲鼠蟻當然係假啦，但其他嘅實景同物品大部分都係喺舊區搵番嚟。想參觀市區更新探知館，要事先預約，詳情可查閱www.urec.org.hk。