原屬首長級第四級嘅食物及衞生局副秘書長聶德權（Patrick）本周一正式「升職」，接替退休嘅余志穩出任屬首長級第六級嘅社會福利署署長，Patrick尋日選擇喺一間青協營辦嘅咖啡店向傳媒分享上任感受。四十多歲嘅佢坦言自己做到呢個位好開心，雖然責任重大及充滿挑戰，但好在自己姓「聶」有三隻耳朵，可以聆聽各方意見，又話自己戴眼鏡，有四隻眼，有助佢多睇多了解，講到仲勁過「十兄弟」嘅順風耳和千里眼咁。
新官上任嘅Patrick表現難免有點緊張，被問及正生學生申領綜援問題時，他猶豫咗一陣，然後以官腔回應話一切會跟既定程序處理。又有人問到，余志穩在任署長時民望甚高，會否為他帶來壓力？本身係教徒嘅Patrick坦言，早已預咗做得唔好會畀人鬧，但就拍心口咁話無論未來面對甚麼挑戰，都會盡力去做好份工，與持分者多點溝通，就社會需求作出適切安排咁話。Patrick一上任就派晒定心丸，究竟日後會否言行一致，就要聽其言，觀其行喇。