早排到書展力撐模嘅「Laughing媽」李麗娟，最近偕好友去馬來西亞檳城玩咗三日，歎盡地道美食，成個人泵脹咗返港。本來肥咗可以慢慢瘦身，但媽打要趕住參加下月舉行嘅同齡同心基金跳舞籌款晚宴，為咗展示優美身段和舞步，媽打連日來積極到跑馬地做運動Keep fit同勤加練舞。
媽打日前着住購自檳城嘅紅色繡花民族服飾去香港會所食晏，花枝招展，心情勁靚，講起旅行固然開心，但提到下月舉行嘅跳舞籌款就更加雀躍。原來當晚嘅參加者，都係十年前與她一起籌組同齡同心基金嘅一班四九年出生名人，大家今年已經六十歲，聚首一堂齊跳七十年代經典舞步，屆時大家真係要落足眼力嘞。
同齡同心基金主要用於本港福利事業，並會救濟一些突發性嘅天災人禍，所以今次跳舞籌得嘅善款，會撥作四川地震災後重建及本港青少年抗毒工作。媽打話，眼見時下青少年吸毒真係好心痛，自己都係婆婆同嫲嫲，唔希望孫兒在毒品污染嘅環境下長大，如果不及時補救，擔心過幾年就會更加嚴重。