我哋接到投訴，話金管局登報紙為攞命陳請秘書，表面跟足一般招聘程序，公平公正，但事實係攞命陳已有內定人選，呢個秘書不是別人，正正就係「攞命陳」做渣打銀行同特首辦公室主任時嘅兩朝秘書。咦，呢場內定人選疑雲，聽落又幾似「攞命陳」入主金管局嘅翻版喎！

兩朝元老 主僕情深

投訴人話，金管局係公營機構，唔可以隨便安插入金管局做嘢，如果局內有空缺，應由內部物色人選，搵唔到先至對外招聘，不過，投訴人指候任總裁陳德霖為咗要帶自己嘅秘書入金管局繼續為佢効勞，不顧既有制度，登報請人，用意非常明顯。

據投訴人報料，事件中呢位疑似內定入金管局嘅幸運兒，正係「攞命陳」當年離開金管局後，去渣打銀行打工嘅秘書，其後「攞命陳」入主特首辦做主任時，亦帶埋佢過去，可謂主僕情深。

投訴人仲話，攞命陳為免事件張揚，登報招聘嘅職位名稱，只係用「Senior Officer」，而唔係打正旗號用秘書相關嘅職銜，而且，公司將會成立遴選委員會進行面試，做場大龍鳳嚟掩飾；雖然金管局歡迎內部同事申請，不過大家都知乜嘢一回事，所以無人願意做花瓶陪跑喎。

我哋就呢單內定人選疑雲查詢金管局，金管局回應話依家確實正在招聘高級主任一職，但就強調金管局每一個職位嘅填補，都會由一個特設嘅招聘小組負責挑選合適人選，根據個別情況，以了解應徵者是否合適及勝任有關工作的人選，又話登廣告係其中一個招聘程序，不過，登廣告用咗幾多錢，金管局就不作評論嘞，亦唔會就個別應徵者嘅資料作評論。

金管局成日畀人話係獨立王國，睇嚟都好難從金管局嘅官方回應，攞到更多有關投訴內容，不過，攞命陳未上任就引來局內人嘅匿名投訴，佢有幾惹火大家都心中有數。