年輕人吸毒問題嚴重，很難想像讀書讀到要驗毒，究竟係邊個嘅錯呢？有人話係社會，但其實家庭教育都好重要。卓妮問過多位政界名人教導子女心得，得出結論係，為人父母首先要以身作則做好榜樣，盡量抽多啲時間陪伴子女，仲要將子女當成朋友看待，總之就不能以為做父母就可以高高在上。
金刀梁以身作則
行政會議成員「金刀梁」梁智鴻育有一對仔女，兒子投身酒店業，女兒捷華就在英國從事資訊科技保安工作，捷華剛放假回港，尋日就陪爸媽一齊到香港會食晏，認真孝順。問金刀梁有乜教導子女心得？佢話最基本係希望子女做一個有用的人，要知道社會對他們有期望，父母亦要以身作則，而梁太就話父母要畀仔女多啲自由度。
至於工程界立法會議員何鍾泰，佢兩個仔都係做醫生懸壺濟世，能夠教到啲仔咁乖又咁叻，莫非有獨門教仔秘笈？何鍾泰話，最重要係畀多啲空間小朋友，抽多點時間陪伴佢哋，大家相處要好似朋友咁，千祈唔好以為做父母就高高在上，總之大家身份要平等，咁就容易溝通好多嘞。
莎姐唔贊成體罰
「莎姐」周梁淑怡同何鍾泰睇法相似，認為要多關心和尊重子女。原來莎姐從未體罰過智美和智琪兩個女，主要透過交談了解少女心事，盡量啟發他們自行思考問題，日子有功，兩個女已習慣主動搵佢傾心事。
卓妮亦都同醫管局主席胡定旭傾過，佢話自己啲囝囝細細個就去咗外國讀書，乜都自己搞掂晒，唔使佢理咁多，肥胡坦言，其實小朋友好壞要睇本質，平時要將子女當成朋友看待，絕不能夠施壓喎。
卓妮