第一個古怪現象叫做「尖東歸西」。尖東站原本屬於東鐵線，家陣撥歸西鐵線，即係歸西。尖東歸西令到搭東鐵過海嘅乘客要先喺紅磡轉車去尖東，再行去尖沙咀站轉線，非常之咁轉折。

第二個古怪現象叫做「短貴過長」。港鐵公司唔知係咪思覺失調，車程較短嘅收費竟然貴過較長。舉個例子，同樣喺南昌站出發，去紅磡總共三個站，八達通收費四元三角，去尖東只係兩個站，收費五元四角。又假設你喺葵芳站上車，經西鐵線去紅磡係六個站，八達通收費七元三角，去尖東只係五個站，盛惠八元。

第三個古怪現象叫做「山長水遠」。新設嘅柯士甸站基本上係一個「沙漠站」，想去算做比較近嘅中港城、九龍站或者圓方商場咩？行囉，烈日當空係咁行囉，冇遮冇掩不斷行囉，風吹雨打繼續行囉。如果你身壯力健，怕且大汗疊細汗之後十分鐘應該行到，如果你唔好彩行動有少少唔方便，功夫茶勸你做好防曬措施，帶備足夠清水，你知啦，家陣郁啲都話酷熱警告，山長水遠乾煎行路廿分鐘隨時中暑。吖，仲有喎，大概係因為過分隔涉，人影冇個，鬼影冇隻，柯士甸站嘅商舖十室十空。

綜合三大古怪現象，大家應該會得出一個正常結論：九龍南線胡混，兩鐵合併搵笨！

係呀，真係好搵笨o架。記唔記得兩鐵合併之前，相關人等有乜嘢承諾？佢哋話喎，合併會產生協同效應，服務會好啲啦，票價會平啲啦，設施會靚啲啦。試問，「尖東歸西」令到乘客兜兜轉轉，服務有幾好先？「短貴過長」即係變相搶錢，票價有幾平先？「山長水遠」反映柯士甸站配套嚴重不足，設施有幾靚先？

家陣經濟差成咁，乘客最關心嘅梗係票價問題啦。其實除咗「短貴過長」呢個咁荒謬嘅收費標準之外，港鐵更加有劏客之嫌。呢嗱，為新線度身訂造嘅「屯門——紅磡全月通」月票，同樣劣評如潮。由於月票以磁帶式車票發出，而唔係八達通，無法追尋乘車紀錄，當中嘅轉乘優惠會不知不覺消失咗。心水清嘅乘客計一計數，以前用八達通，美孚去旺角只係三元六角，家陣用新月票，收費變咗五元四角，即係變相加價五成！

嘩！黑店劏羊牯都未必夠膽劏得咁盡啦，港鐵蠱蠱惑惑整張新月票，竟然劏客五成車費，唔到你唔寫一個服字。

所以話啫，兩鐵合併非常之咁搵笨。計功夫茶話齋，又係火爆議員出動嘅時候嘞，立法會放完暑假之後必須好好質問港鐵嘅大股東特區政府，問下官老爺係咪想劏到市民一頸血。如果官老爺支吾以對耍太極，咁又點呢？掟蕉囉！