香港唔少屋企都係「一孩家庭」，父母將最好嘅嘢畀晒小朋友，反而令小朋友形成依賴性格。前民政事務局局長何志平嘅太太胡慧中就有先見之明，趁呢個暑假帶囡囡去旅行增廣見聞兼學獨立。早排我哋喺中環撞到何太，佢啱啱帶囡囡淦璇同一班朋友去完日本東京、淺草旅行，雖然肥平冇一齊去，不過一樣玩得好開心。
何太話自己係孝順個女嘅「孝女」，囡囡係佢嘅一切，對佢簡直係貼身照顧，囡囡無論沖涼、換衫都有工人幫手，不過已經八歲嘅囡囡係時候學吓獨立。何太今次去旅行冇帶工人同行，等囡囡學識照顧自己，沖涼、着衫、摺衫全部自己搞掂，做媽媽嘅佢不知幾高興，仲話係今次日本之旅最大嘅收穫。何太仲教我哋一個慳錢方法，就係住啲平平哋嘅酒店已經可以，反而食早餐就去五星級大酒店，等小朋友可以見識吓喎。
唔知去完東京嘅何太有咩心水推介？佢話今次冇去小朋友最鍾意嘅主題公園，反而去咗海灘游水曬太陽，囡囡一樣咁開心。此行何太都有畀囡囡試吓食魚生，不過佢話囡囡最鍾意都係食雪糕，依家成個肥妹仔咁，要做多啲運動，多啲游水、打波同溜冰先得，名副其實係廿四孝媽咪！