其實呢個話題都已經講咗好一段時間，大家可能仲記得，○七年廿二個泛民立法會議員聯合搞咗個「二○一二雙普選」網頁（www.2012us.com），話要提供一個平台畀網民討論政改和普選。想當初泛民大鑼打鼓係威係勢，又整吉祥物、又喺網頁上發起萬人撐傘爭普選，仲誓言要打破健力士世界紀錄，結果○七年嘅撐傘行動只係得五千人去，仲要喺大半年後被踢爆根本無打破過世紀。

其實個網站好耐無人提過，就算大家依家想上去望吓，亦已經太遲喇，因為個網頁已經無聲無息咁摺埋咗，剩番一大個廣告，話「2012us.com」呢個網站域名待價而沽。其實一般網站域名嘅合約都係兩年，到期畀錢再續約，唔畀嘅話供應商就有權將個域名賣畀其他人。到底係無人知個網站過咗期，定係泛民唔想繼續搞落去，真係要問番當事人先知。