如果要出一本香港版《死亡地圖》，有冇詳細統計數字就難講，之但係，斷估死亡率最高嘅地區一定係全港各大屋邨。呢嗱嗱嗱，屯門山景邨啱啱又發生一宗倫常血案，阿仔涉嫌殺老竇。同一條邨，同一座樓，幾個月前亦有類似事件，阿仔涉嫌殺阿媽。

屋邨點解零舍死得人多？窮吖嘛，貧苦大眾往往為咗柴米油鹽家嘈屋閉，天水圍就係出晒名嘅悲情城市。另外仲有一個好主要嘅原因，身為大業主嘅房屋署，對於屋邨居民係非常之咁冷血無情嘅。譬如話，七老八十行動不便嘅長者，要求房屋署幫佢哋將浴缸改建為企缸，減少傷亡危險，官僚嘅反應係：唓，你都唔係好殘好弱啫，冠心病之嘛，改建冇得傾！

大家知唔知浴缸係幾咁危險？功夫茶甚至認為係家居意外頭號殺手。浴缸可以令你跣腳，可以令你低，可以令你遇溺，一個唔覺意，隨時瓜老襯。相對嚟講，企缸安全少少，起碼對於老人家嚟講，唔使大步大步跨出跨入吖嘛。

有一位八十八歲住葵青安蔭邨嘅周婆婆患有冠心病，活動有難度，曾經向房屋署申請將浴缸改建企缸，點知畀佢吹到啤一聲，署方職員話「呢個病申請唔到」。言下之意，冠心病未夠嚴重。跟住唔知算係好彩定係唔好彩，周婆婆外出跌倒，醫生證明係輕微中風，房屋署咁先至肯幫佢改建企缸。

計功夫茶話齋，人哋八十幾就快九十歲喇，即使冇病冇痛，房屋署順應要求改建企缸都好應該啫。唔該署長陳鎮源幻想一下，當你老到咁上下年紀，手又騰，腳又震，一級樓梯都可能仆鬼死你呀，莫講話兩呎高嘅浴缸！

立法會議員王國興批評，現時向房屋署申請浴缸改建企缸程序繁複，要先取得醫生證明，再轉介職業治療師評估，就算批准，由申請到完成工程一般需時三至六個月，所以要求署方簡化程序。喂，程序繁複成咁，假如陳鎮源係八十八歲嘅屋邨居民，由申請第一日開始，係咪唔沖涼三至六個月呢？到時咯喎，唔係仆死，而係臭死。

所以話啫，全港各大屋邨一定係死亡率最高嘅地區，因為特區政府漠視居民需要，尤其係漠視長者安危。

咦，咪住先，三至六個月唔沖涼會臭死呢個講法，好似冇乜科學根據咁喎。不如咁嘞，交畀陳署長親身做一個實驗，等申請改建嘅長者得一個知字都好吖！