從事科學嘅人都習慣講數據，天文台台長李本瀅當然唔例外。佢喺網誌發表咗一篇叫做《端午節的氣候》嘅文章，有圖有表，詳解端午節嘅氣候變化，原來係為咗回應網民質疑，認真嘅態度足以令唔少高官汗顏。
話說李本瀅喺五月尾嗰篇網誌中提及，香港過去幾十年來，端午節之前六個夜晚裏面，氣溫低過攝氏廿五度，稱得上「舒適晚上」嘅日子買少見少，由上世紀八十年代嘅五成跌到近十年嘅三成。不過網誌出街後惹嚟網民挑戰，質疑每年端午節嘅日子都唔同，加上今年端午節天氣比較涼，有六個「舒適晚上」喎！
隔咗近三個月後，李本瀅終於出手，佢用圖表列出過去六十年端午節喺每年新曆第幾日，結論係有規律可尋。然後仲摷番上世紀五十年代嘅數據，證明由五十年代到依家，「舒適晚上」嘅日數大體上係跌勢，加上香港嘅氣溫每十年升零點二度等。
摷咗咁多數據，無非要證明氣候暖化係不爭事實，大家再唔做嘢，香港好可能再無冬天啦！