尋日大角咀有場籃球比賽，徐英偉同商務及經濟發展局副局長蘇錦樑（Greg）、保安局政治助理盧奕基都有出席，一身球友打扮嘅Greg同徐英偉表現親民，亦打得有板有眼，但最終都係輸波。

打輸波嘅徐英偉之後同記者講，近來佢忙於着力推廣禁毒，形容自己嘅工作係民政事務局嘅「民意收集機」。既然落區落得咁頻密，咪可以順便提升番自己嘅知名度囉，點知呢部「民意收集機」就耍手擰頭，話唔介意自己有冇人識，仲話無人識反而做嘢仲方便，行過街邊都可以同邊青傾偈！

徐英偉係咪搞錯咗，以為自己係社工？社工年薪唔使百幾萬咁高喎，政治助理應該喺群眾之間搞政治，又點會無人識仲好？去年邊位同佢講工？搞到佢誤會晒。徐英偉仲話如果要人認得，可以做好多嘢，但即係要做乜，佢就冇講嘞。