廁所文化真係博大精深，近排好多名人外遊都遇到廁所趣聞，平平無奇嘅一篤小便變得極具意義。好似議員陳克勤到江西考察，就發現當地小朋友在臭氣熏天嘅旱廁內勤奮讀書，而自由黨高層遊西藏又在布達拉宮發現去得好驚險嘅懸空奇廁。最近前馬會行政總裁黃至剛夫婦去咗日本北海道自駕遊，當地公廁亦為佢兩公婆帶來新驚喜。
幾個月前做完右腳半月板手術嘅黃至剛早前同太太去咗北海道自駕遊，勁歎地道美味海鮮。黃至剛話，以前去過好多次日本旅遊，每次都帶來新驚喜，今次驚喜就係來者不拒嘅公廁。
黃至剛話日本廁所普遍好乾淨，就連自駕遊中途站嘅油站廁所都唔例外，一啲臭味都無，大讚日本廁所文化值得欣賞。在旁嘅黃太都話：「係啦！香港啲公廁未埋到去已聞到一陣臭味，搞到唔係好想去，內地嘅公廁就更加惡劣。」其實香港公廁嘅衞生情況近年已經大有進步，不過大家仍然認為香港公廁又臭又污糟，都幾難搞。