旅遊界立法會議員謝偉俊（Paul）上周五晚喺尖沙咀一間川菜館豪擺四圍，慶祝攞番律師牌照，並慰勞律師行同事過去一年嘅辛勞，咁啱白姐姐上周六生日，阿Paul於是「順便」同白姐姐慶祝生日。既然咁高興，阿Paul就自掏荷包攞五千蚊出嚟抽獎，當中有三封係一千蚊大利是，點知白姐姐人逢喜事，時來運到抽中咗自己。
阿Paul為咗公正，要佢嘔番出嚟再抽過。不過白姐姐難得生日中頭獎，又點會肯攞番封利是出嚟吖，佢仲一邊手執利是，一邊埋怨話：「阿Paul咁耐都無送過生日禮物畀我呀！」
回想停律師牌一年嘅日子，阿Paul坦言，律師行賺錢無佢份，損失數以百萬計收入，依家攞番個牌叫做多件架生搵食。問阿Paul以後仲敢唔敢影裸照，佢話暫時唔會再用呢個表達手法，如果再影，之前會先Keep fit，事關身材已經不復當年勇喎！其實佢謙啫，阿Paul今年四月參加港鐵競步行時，着咗細一個碼嘅Ｔ恤同單車褲騷身材，成績仲係參賽議員之冠添。