田少透露，自由黨早喺西藏集思會前已展開二○一一年區議會選舉嘅部署。上屆區選，自由黨派咗五十六人出戰，耗費大量人力、物力，但最後只得約三分之一人當選，吸取教訓後，下屆會改行精英制，實行貴精不貴多，縮短戰線以集中火力喺有把握嘅中產區出擊。

到底自由黨最終派幾多人出戰？田少話：「最後係二十幾人定三十幾人，依家都未知。」不過，黨內二十二名現任區議員應該都會再披甲上陣，其餘嘅就以新人為主。田少多番強調，候選人首要條件係夠勤力同有承擔。

慳番租金 資源激增

事實上，自由黨喺下屆區選會出現參選人數銳減，資源激增嘅有利情況。何解？皆因自由黨總部年初搬到田少旗下嘅Manhattan Place，田少只象徵式收番一蚊作為租金，所以自由黨每月可以慳番十幾萬元租金，而呢筆錢將會用作加強地區工作。

部署方面，田少憶述自由黨喺上屆區選時，到○七年二月先啟動選舉工程，直到四、五月才「揀蟀」參選，真正落區做嘢得半年時間，所以選舉最終失利。佢自言自由黨痛定思痛，依家已經開始作出部署，先由正副主席劉健儀、方剛、張宇人加上四個支部主席何顯明、方國珊、周永勤和邵家輝連同常委田北辰開展遴選工作，令候選人能夠有兩年時間讓選民認識，打好關係。出錢出力嘅田少都好認同上述嘅調整方案：「○七年得六個月落區，時間實在太短，而且當時火頭太多，希望調整之後成績會好啲啦。」

自由黨創黨嘅時候經濟掛帥，地區事務畢竟較弱，對於兩年後嘅區議會選舉部署，其他黨派都已經開始諗緊，自由黨依家起步，算係跟得上形勢，有進步喇！