旅遊事務專員方舜文（Margaret）上任八個幾月，表現仍然低調，不過原來佢識飲識食，喜愛嘅食肆平貴都有，睇嚟都好夠資格推介香港美食。Margaret尋日透過大氣電波唔點名提及多間食肆，卓妮根據佢嘅「貼士」四出查訪，砌出佢嘅美食圖鑑，包括銅鑼灣壽司廣魚生壽司、中環麥奀記雲吞麵同車氏粵菜軒菠蘿叉燒包等。
揀食肆平貴都有
Margaret捨得食，高檔日本菜更係逢有喜慶要食飯慶祝嘅首選，佢推介銅鑼灣一間星級壽司店，話魚生鮮味到不得了。根據佢喺電台節目畀嘅「貼士」，壽司店係喺啟超道嘅樓上舖，同一幢大廈仲有餐廳專賣日本天婦羅。經過明查暗訪，結果謎底係壽司廣，不過間壽司店正確位置係恩平道亨利中心至啱，老闆廣居祥演擁有壽司店同天婦羅店一共三層，呢度消費一啲都唔平，每人平均消費要八百至一千蚊，金管局總裁任志剛同埋好多高官都係常客。
如果要平民化一啲，Margaret嘅首選係中環一間老字號麵店嘅雲吞，佢話一啖食一粒，夠晒滋味。今次好易估，一聽就知佢講緊麥奀記麵店。Margaret又介紹灣仔駱克道一間中菜館嘅菠蘿叉燒包。其實係由藝人車婉婉媽媽車綺芬開設嘅車氏粵菜軒，菠蘿叉燒包的確好聞名，特別係佢啱啱出爐熱辣辣香噴噴，咬落不知幾軟熟，卓妮諗起都想食。
最愛皮蛋瘦肉粥
講到請客食飯，Margaret會揀中環威靈頓街兩間老字號食肆，唔使問阿貴都知，佢講緊鏞記及陸羽茶室喇，要請客都係老字號穩陣啲。Margaret話，食嘢最緊要食物質素，所以平日愛吃蒸魚同白灼蝦呢啲既簡單又考驗新鮮度嘅食物，要食蒸魚，佢就話最愛「海旁嗰間」，香港咁多海旁，今次真係難估，唔通佢指嘅係鯉魚門？
Margaret識飲識食，媽媽影響佢最深，如果只准佢揀一樣下半世日日都食嘅食物，Margaret毫不猶豫揀皮蛋瘦肉粥，因為屋企嘅傳統，媽媽每星期日都會煲粥，而佢又特別愛皮蛋。
卓妮