立法會梁展文專責委員會單官司聽日正式開庭，新世界之前請咗喺香港大律師名冊排名第一嘅前立法局主席施偉賢幫佢哋寫入稟狀。但有資深法律界人士話，施偉賢排名第一主要係佢最早出道、年資最深，並唔代表佢收費最高，仲話依家全港收得最貴嘅民事案大狀，應屬最近畀律政司請咗、嚟緊代表政府列席梁展文官司嘅資深大律師唐明治。
呢名法律界人士如數家珍話，唐明治回歸前做過律政司，本身有料就唔在講，加上佢回歸後返咗英國居住，請佢返嚟香港打官司要包埋機票、酒店等食宿開支，而且唐明治年紀雖然有番咁上下，但近年佢出庭時仍然轉數好快、表現精靈，同佢太太、前兩局首席議員鄧蓮如勳爵同樣活躍，冇任何老化衰退嘅迹象，先可以繼續收咁貴。
其實政府今次只係以「涉及團體」（interested part）嘅身份列席官司，唔係正式嘅與訟雙方，估計只會講番涉及政府利益嘅觀點，有冇需要動用公帑聘請最貴嘅大狀應訊，真係見仁見智。立法會早前要求政府科水應付梁展文專責委員會單官司，政府就諸多留難，自己轉過頭又聘請盛傳係全港最貴嘅大狀，擺明係孤寒人闊佬自己。