Margaret話，人人都有唔開心嘅時候，冇人可以一世順境，所以如果一遇到逆境就只係識埋怨，對邊個都無好處；但如果掉番轉，大家都抱着要克服嘅心態面對，成個世界都會好好多嘞！其實Margaret絕對唔係得個講字，佢話自己一生雖然無乜大起大跌，但不時見到自己嘅朋友、客戶喺金融風暴中突然乜都無晒；就算唔係親身感受，都會感染到嗰種負面情緒，所以佢做人態度係積極面對，即使有少少低潮都要勇往直前，仲話有時間不如諗吓點防止唔好嘅事發生好過。

不過，有啲嘢總要善後處理，好似台灣眼前嘅災後重建就係例子。Margaret前日啱啱喺台北返嚟，話睇電視見到小林村成條村畀莫拉克夷平咗，覺得好慘、好唔安樂，仲拍心口話會盡力幫手添！