雖然仲有兩個零月先到外國人鬼節萬聖節，但海洋公園尋日已經率先介紹今年佢哋「哈囉喂」節目。素有「扮嘢文」之稱嘅海洋公園主席盛智文當然唔會放過扮嘢機會，佢今年個造型叫「魔界王」，聽落好猛料，出場時仲喺個墓度「爆」出嚟，好有氣勢㗎！不過睇真啲，「扮嘢文」除咗將塊面化到面目猙獰外，頭戴鳳冠、身穿龍袍，點睇都似「帝女花」甚至「美猴王」多過似「魔界王」喎！
大家都好想知點解「扮嘢文」走去扮周世顯或孫悟空，佢就為自己嘅造型辯護，話自己廿多年來喺蘭桂坊搞萬聖節活動，做咗海洋公園主席又大搞「哈囉喂」，早就將萬聖節變成本土節日，所以今年以中式造型示人都幾貼切喎。不過問佢用咗幾耐時間預備呢個造型，佢好神秘咁唔肯透露，仲同女記者打趣咁話咪好似佢哋見男朋友約會前化妝化咁耐喎。
「扮嘢文」今次有啲老貓燒鬚，但誠意搭夠，為咗宣傳鬼屋遊戲，竟然親身瞓棺材，認真大吉利是。有攝影大佬影唔到相要求佢瞓多次，佢都無托手㬹，仲交足戲話自己係「魔界王」無有怕添。