上任年幾嘅城市大學校長郭位，接任時就話要學好廣東話，希望可以多啲同學生溝通，事實一再證明，溝通唔使一定要用口講，肢體語言都可以做得到！話說尋日郭校長出席由學生會搞嘅迎新誓師大會，班新生知道郭校長嘅廣東話未練好，一開始就主動用普通話同佢打招呼，仲分批跳舞畀佢睇吓、評吓分。
郭位本來只係同三百五十幾位新同學見吓面，歡迎佢哋加入城大，但後來見到四百個新舊學生一齊落場跳舞，郭校長邊睇邊拍手，仲愈睇愈高興；等班學生跳完一次，佢終於忍唔住落去跳埋一份。不過班學生練咗咁耐先跳畀校長睇，郭位點可以睇一次就學得識吖，惟有跟住班學生嘅舞步跳。雖然最後只係跳咗短短五分鐘，但可以咁近距離同郭校長打成一片，班學生不知幾興奮！
事後郭校長大讚班學生跳得好，仲話雖然佢唔可以陪啲新同學一齊入迎新營繼續玩，但決定咗今日入度假營探佢哋，到時仲會同大家一齊扯大纜添！郭校長咁識同佢班學生打成一片，使乜驚有語言障礙吖！