今日功夫茶想為大家介紹另外一條好有特色嘅天橋，就係深水埗欽州街行人天橋嘞。呢條天橋最盞鬼嘅係，正常時間係冇人用嘅，設計失誤吖嘛，不過一到非正常時間，條橋就變得熱熱鬧鬧，興奮過酒井法子客串ＤＪ大笑大跳。即係咁，天橋一方面係流浪漢嘅安樂窩，另一方面係癮君子嘅聚腳點，得閒就落去開餐。

癮君子聚腳開餐，係咪可以叫做毒窟呀？冇錯，毒窟。欽州街行人天橋藏污納垢，隨地都係針筒。街坊甚至話，有啲道友隨手就將針筒由天橋上面掟落街，唔知邊個倒楣畀佢掟中，流少少血都仲係小事，萬一惹上愛滋就大大煲兼夾杰撻撻咯。

咦，咪住，既然曾蔭權話率領三司十二局摸着石頭過河全力抗毒，冇理由淨係掛住推行校園驗毒啫，點解唔去掃蕩天橋毒窟？有趣嘅地方就喺呢度嘞。深水埗區議會早於○三年已經提議，既然欽州街行人天橋使用率極低，為免淪為烏煙瘴氣嘅犯罪黑點，不如索性一嘢拆咗佢啦。點不知，拖下一年，拖下一年，一年又一年，至今足足拖咗六年，政府遲遲都唔肯拆喎。

政府官僚懶懶閒閒唔做嘢，咁就辛苦晒差人叔叔嘞。根據警方紀錄，今年上半年喺天橋毒窟進行過二百六十次反罪惡突擊巡查，即係平均一日掃場一次半，期間偵破十六宗與毒品有關嘅案件，拘捕十八人。

功夫茶今次要讚一讚警隊，一日掃場一次半，你都咪話唔勤力。問題係，長掃長有，趕之不絕，證明呢條天橋的確係癮君子嘅至愛，非常之咁受歡迎。

事實上，審計署早於○七年已經批評過運輸署轄下多條行人天橋使用率低，包括欽州街呢一條。既然正人君子唔用，只係益晒不法分子，點解唔一了百了拆咗佢呢？運輸署話喎，清拆行人天橋十分敏感，當局必須小心研究。

計功夫茶話齋，研乜鬼嘢究吖，今時今日講緊全民抗毒，雖然校園驗毒搞到唔湯唔水，曾蔭權撞板撞到口腫鼻腫，之但係打擊毒禍始終係百分百正確嘅。運輸署畏首畏尾唔去拆天橋，唔啱數啫，隨時陷煲呔曾於不義，以為佢嘅抗毒大戰流於齋噏。

不如咁嘞，運輸署署長黃志光二擇其一，一係清拆天橋毒窟，一係清拆署長烏紗，你揀啦！