話飛天朱老而彌堅，係有相為證㗎。三個月前飛天朱喺菲律賓嘅實用射擊大賽，勇奪Level3級別標準組冠軍之後，今個月初又去新加坡參賽，佢舉槍射擊時，一對麒麟臂堅挺有力，啲肌肉一舊舊，結實過好多後生仔。佢今次比賽，係參加老人組，對手有四人，最終得第二名，但大會不設獎盃，屬玩票性質；如果真正比賽，佢嘅肌肉可能谷得仲行。

飛天朱一向鍾情刺激運動，除咗玩實用射擊，深海潛水同賽車都啱，更加因為熱愛跳滑翔傘而有「飛天朱」稱號，可以話海陸空都畀佢玩晒，好似下個月初咁，佢就會去湖北玩跳傘，真係體能差啲都唔掂。飛天朱尋日話，為咗保持體能，佢Keep住每個星期玩四次健身，與鐵餅為伍；以前打過泰拳，依家改玩詠春，詠春注重腰馬工夫，令佢體悟出做人最緊要打穩基礎嘅道理。佢呢句話，唔知係咪講緊自己嘅體質呢？