隨着西港島線動工，「大學站」之爭又再熱起來，因為除咗喺中文大學旁邊嘅「大學站」外，西港島線連接港大嘅車站亦暫時叫做「大學站」。唔少立法會議員都係呢兩間大學嘅畢業生，但佢哋大部分都冇車站情意結，話最緊要唔好為改名而勞民傷財。
公文袋余若薇同陳淑莊（Tanya）呢兩個港島議員兼港大校友都話唔好亂郁現有車站名稱，新車站改乜都得。Tanya笑言身邊有啲中大人反應好大，話如果新車站又叫大學站就「瞓港大」抗議，佢自己叫大家咪執着，新車站叫「港大」又得，以附近街道命名又得，最緊要唔好令公眾混淆。
另一個港島議員兼港大校友葉劉淑儀就唔多撐母校爭「大學」之名。佢話西港島線會喺山道建一個通風口，附近居民擔心影響空氣質素，建議通風口改喺港大任白樓旁邊，但聽聞港大唔多願意，葉太揶揄港大，佢哋又唔肯畀，又要個站名同港大有關，令好多人唔服氣。
至於中大畢業嘅議員一樣冇所謂，好似醫學界梁家騮就話：「只要唔對其他人不敬或者構成歧視，可以兩個都叫『大學站』。香港都有唔少地方同名，好似大圍附近都有個地方叫銅鑼灣，但冇聽過有人會去錯地方。」陳克勤就覺得可以效法「旺角站」同「旺角東站」嘅做法，用方向作識別。