甘威原定上周一晚登機飛去捷克布拉格，點知撞啱颱風「天鵝」襲港同飛機壞電腦，最後等到星期二朝早轉乘另一班機再喺芬蘭轉機，一來一回唔見大半日。途中佢又試過喺當地深夜兩點鐘接獲本地傳媒嘅越洋電話訪問，喺凌晨四點鐘同香港辦事處同事商討公務，又要晚晚將即日影落嘅靚相同所見所聞放上佢嘅個人網誌，結果經常冇覺好瞓。

講番個行程本身，甘威喺布拉格睇咗幾場要畀錢嘅文藝表演，但最令佢難忘嘅反而係當地嘅免費街頭表演、四色環保回收箱同又乾淨又有創意嘅公廁設計，認為值得香港借鏡。佢哋一家三日後坐火車去音樂之都維也納，睇咗幾場歌劇，再去奧地利薩爾斯堡莫扎特嘅出生地，甘威話，無論食品、手信以至咖啡廳，莫扎特嘅大名成為當地嘅搖錢樹，甚至可以話到了氾濫嘅地步。去年甘威好唔容易入到立法會，難怪佢連旅遊都不忘寫網誌同大家分享。