本文重點
廠商會近年力洗老牌商會形象，趁今年踏入七十五周年，大鑼大鼓搞活動省招牌，尋日會長尹德勝率領一眾副會長及行政總裁開記者會，宣布九月份起有連串搞作，包括九月四日舉行千人酒會，又同馬會合作搞廠商會周年盃，仲會出書，夠晒揼本！尹德勝仲爆料話籌組緊一個智庫，取名「才略工場」，初步由佢擔任總監，再搵會內四至五人擔任召集人，分別就工商、財經、創意文化、社會經濟及教育等範疇進行研究，有好橋就獻畀政府。
有意走直選路線
為了壯聲勢，廠商會將拉攏學者、社會名人入會做顧問，咁疑似特首候選人梁振英係咪招攬對象之一呢？尹會長有所保留話：「我唔想有利益衝突喎。」廠商會咁肉緊搞智庫，尹德勝承認係有意培訓政治人才：「我鼓勵商人從政及直選路線，依家做好啲基建，等將來叫人出來參選都唔使太突然。」卓妮問尹會長係咪有意參政？佢賣關子話：「真係唔知喎，咁長遠嘅嘢！」
廠商會想喺政壇多啲介入，當然要同各路人馬打通脈絡，尹會長更出面約見城中大孖沙傾偈，頭炮係下星期約咗信置主席黃志祥食飯；恒隆地產主席陳啟宗亦已答應飯局，日後唔排除敲埋李兆基等大孖沙嘅大門。
一句講晒，就係要突破廠商會框框，唔止面向中小企咁簡單。又係嘅，如果大孖沙肯發功照住廠商會，做乜都水到渠成喇。
卓妮