卓妮尋日在香港會門外遇見小霍，問佢參加亞洲武術運動會有乜趣事，佢話開幕當日同總理阿披實在運動場外等候皇室人員到場時，眼見一條紅色長地氈由路邊直通會場，行慣紅地氈嘅小霍，起初以為可以同阿披實一齊尾隨皇室人員行紅地氈進場，後來發現阿披實只在紅地氈以外行走，佢亦醒水行埋一邊，事後才獲悉紅地氈係皇室人員御用嘅。

政府申辦東亞運動會搞到寒寒酸酸，要打鑼籌款做宣傳，小霍尋日暗諷港府唔識寶。佢話好多國家都爭辦國際性大型運動會，不僅東南亞國家，就連中東國家都想分一杯羹，事關可帶來可觀收益。港股重上二萬一千點，經濟好轉，小霍話距離東亞運仲有幾個月，如果各界善長有心支持東亞運，都仲嚟得切嘅！

門券交田少推旅業

旅發局主席田北俊早排話仲未攞到東亞運門券向外地推廣，小霍解釋話近日有好多工作要做，開會開到無時停，希望盡快印好門券交到田少手上。佢笑笑口話：「我都希望幫到田少推動本港旅業嘅！」

卓妮