《基本法》規定香港行政主導，不過，弱勢政府無強政，回歸以來，特區施政一直被民主派牽住鼻子走，令《基本法》行政主導呢一條變相無法貫徹落實，呢條罪名認真大。棋哥嘗試為港府解脫，將責任歸咎於立法會，繼發表「權力膨脹」論之後，日前接受訪問時，又批評行政立法關係畸形，倡議建制派發展強勢政黨，合力撐政府。棋哥都算一片苦心，不過，所謂勉強無幸福，強制建制派議員撐政府，等如推行強制驗毒，點會有好結果？

我哋尋日問過多位建制派議員，個個對棋哥嘅建議耍手擰頭，齊口說不！「金勞詹」詹培忠奉勸港府，千祈咪指望友好議員收口，做橡皮圖章，事關議員嘅天職，就係監督行政機關，港府施政出現問題，建制派尤其直選議員如果隻眼開隻眼閉，分分鐘會流失選票，萬一四年之後，被泛民搶盡直選議席，主導議會，到時港府就真係有得震冇得瞓嘞。

金勞詹又話，建制派議員批評政府無問題，只要目的係「愛國愛港」，唔係「反中亂港」。佢仲話，建制派議員唔係「天生殺人狂」，如果港府施政受市民歡迎，議員又點敢亂向官員開刀呀？

無權訂政策 無義務護航

工聯會黃國健（KK）仲坦白，直言香港無執政黨，政治架構先天注定議員個個係反對黨，尤其政府醞釀政策出台，政黨無份參與，建制派議員無權利參與制訂政策，自然無義務為政府擋箭、護航，所以當政策出台，議員啃得落就啃，啃唔落惟有直斥其非，咁至夠公平嘛！

廠商會立法會代表、「五散人」之一嘅林大輝，對建制派議員組強勢政黨撐政府嘅建議，亦表明有好大保留，話政府施政得唔得到議員支持，就要問吓政府自己有乜問題嘞，唔該高官們以後多啲嚟同議員溝通吓，互相了解多啲咁話。即係話，港府一向對議員尊重唔夠，咁就咪怪議員唔撐你嘞。建制派議員一講起特區政府，齊聲狠批，槍口一致，點會係一盤散沙！事件反而反映煲呔曾嘅強政勵治建立喺流沙之上就真。