之不過今次大家嘅眼鏡全部跌到爛晒，原來青少年今次去九展並唔係為咗買寫真以及攬枕，查實佢哋係因為中學會考成績未如理想，想報讀毅進課程，好好裝備自己，希望畢業後可以拎到一個等於中學會考五科合格嘅資格，將來易啲搵工。

毅進課程閒閒地要使幾萬蚊，但青少年都要爭住報讀，正正反映咗「升學難，就業難」呢個苦況。冇錯，後生仔有上進心，肯自我進修增值，當然係值得讚啦。其實，除咗毅進之外，唔少私營教育機構都乘機開辦一大堆進修課程，可惜呢啲課程良莠不齊，政府又冇監冇管，搞到唔少學生進修完冇用不特止，仲要孭到成身債。

呢嗱，近排有私營教育機構大賣廣告吸引應屆會考生，宣稱佢哋開辦嘅海外課程獲評審局「評核」及教育局「註冊」，而且門檻極低，會考生中、英文肥佬都冇問題，一樣無任歡迎，最快兩年八個月畢業，極速成為大學生，不過學費一啲都唔平，盛惠十五萬蚊。

聽落就幾吸引，不過大家千祈咪以為「已註冊」等於「已通過學術資歷評審」，根據法例規定，所有喺香港招生嘅海外課程必須註冊，但教育局只係按課程所屬國家嘅學術評審水平了解內容，香港合作夥伴只要有辦學場地，就可以獲准註冊。有冇搞錯呀，原來開辦海外課程咁兒戲，即係話阿貓阿狗都可以獲准註冊，咁仲得了？

教育當局闊佬懶理，加上評審局對學術資歷評審瞌眼瞓，搞到周街都係魚目混珠、未經評審嘅海外課程，如果學生分唔清，差錯腳跌落呢個升學陷阱，隨時浪費金錢又嘥時間。最搞笑嘅係，學生讀完之後居然要自己拎課程資料去評審局申請個人學歷評估，一個唔好彩得唔到認可，真係喊都無謂。

評審局話就話為咗補鑊，今年首度推出非本地課程評審先導計劃，分階段邀請開辦課程機構接受評審驗明正身，最弊係願意接受評審嘅課程只得小貓三四隻，冇人聽佢支笛。

唉，用個腦諗吓都知啦，如果教育機構認為課程夠秤，為咗提高招生號召力，一早已經自動自覺申請評審啦。單靠教育機構自己投案點得㗎，當局有責任對學生哥提供多啲協助，主動出擊，立例規管，堵塞漏洞，點可以任由呢啲未經評審嘅課程話開就開，話辦就辦，咁豈不是靠害學生？

其實講到底，教育高官唔理課程質素、唔理學歷認可，只係為咗低失業率，等同學仔暫時唔好加入失業大軍之嘛。所以話呢，煲呔曾將「教育產業」納入「六大優勢產業」，可以講得上係實至名歸㗎，香港辦學冇監冇管，大把學生做老襯，外國野雞學校仲唔排住隊嚟掠水咩！