昂坪三碌拎纜車同寶蓮寺係歡喜冤家，三碌拎開幕初期，成日畀寶蓮寺住持智慧大師潑冷水，直至啱啱調走嘅三碌拎董事總經理張少華上任，花咗唔少心機先至氹得佢老人家歡喜。張少華上月功成身退返港鐵，臨走不忘向接手嘅李殷泰（YT）面授機宜，其中一招當然係同鄰居打好關係！
唔怪得YT上月廿日履新，櫈都未坐暖，就第一時間過寶蓮寺拜會呢位地膽。大師見佢咁識做，好熱情咁招呼佢四圍參觀，帶佢睇吓大雄寶殿、天壇大佛咁，仲請YT品嘗齋菜添。YT落足嘴頭，勁讚大師呢排精神好好，健步如飛，行樓梯仲快過後生仔喎，大師聽完肯定冧晒啦！
其實三碌拎好想同寶蓮寺拍住上吸引遊客，希望第日昂坪市集搞function，大師都手下留情，唔好鬧佢哋騷擾佛門清淨地。同張少華一樣港鐵出身嘅YT話，三碌拎係香港著名旅遊景點，覺得自己接任董事總經理好似做咗旅遊大使，三碌拎呢個月十七日開始關閉六星期大修，爭取十‧一前重開，呢段時間佢會閉門度橋，睇吓有乜新搞作，可能會考慮將三十六架水晶車廂底部嘅橫樑移走，變成完全不設防，令乘客睇風景更過癮。