被視為下屆特首候選人熱門嘅行會召集人CY梁振英最近頻頻曝光，尋日又出席自由黨嘅消費券第四波——「書中自有黃金屋」活動，同一班學生分享吓讀書心得。CY千揀萬揀，揀咗《與ＣＥＯ對話——英雄造時勢》呢本書嚟做分享，仲話就算小學三年級嘅學生，慢慢一個個字睇都一定睇得明，仲即場送本書畀其中一個小朋友。盛傳有意出選下屆特首嘅CY，竟然同大家分享英雄造時勢，到底有咩特別含意呢？CY就話同選唔選特首無關係，但問到選特首算「英雄造時勢」定「時勢造英雄」時，CY就點都唔肯答，仲反問邊個會出嚟選特首添！
CY又澄清，佢唔係專登增加曝光率，佢過去廿年一直有落社區做嘢，只係傳媒之前無咁留意咋喎。不過一講到佢係咪熱門嘅特首人選，佢就笑笑口咁話，依家根本連熱門嘅前提都無，要先做好自己嘅本分。咁乜嘢係熱門嘅前提呢？係要報名參選之後，定係要得到中央祝福呢？CY就冇詳細解釋。
CY除咗送書之外都有收穫，主辦活動嘅立法會議員方剛，知道CY即將去絲綢之路，又就嚟生日，送咗本關於絲路嘅書畀佢，CY收到後都不知幾開心。活動一結束，佢話趕住坐飛機去新加坡出席活動，正好喺飛機上睇。