09/08/2009

政情:大輝帶港隊比武報捷

曾經呻過政府唔識貨、唔搵佢做體育事務嘅林大輝出番啖氣,事關大輝月初就以團長嘅身份,帶住一班香港武術代表到曼谷,參加第一屆曼谷亞洲武術運動會。首次做團長嘅大輝好好腳頭,港隊參加嘅五個項目入面,有四項都攞到牌,成績非常唔錯!

大輝早前打電話嚟報喜,話好滿意今次港隊嘅表現。本身諗住以武術運動會做熱身、準備年尾出戰東亞運嘅香港武術隊埋單計數後,除咗喺女子泰拳項目贏得銀牌,仲喺武術項目男子散手同男女子器械對練中攞到銅牌。大輝話今次港隊嘅成功絕非僥倖,因為亞洲武術運動會有五十四個國家及地區參加,對手實力之強,競爭性之大,要攞牌分分鐘難過喺得九個國家及地區參加嘅東亞運動會!

為東亞運打強心針

大輝話今次一銀三銅嘅成績令人鼓舞,為港隊打咗支強心針,使佢哋更有信心迎戰東亞運。大輝入咗立法會後,做咗立會足球隊隊長,同領隊譚偉豪拍住上,令成隊波生猛唔少。佢做班主嘅沙田足球隊又升班,今日仲拜神開操,睇嚟佢喺體育界仲大有作為。

會考資訊一click即睇
詳情瀏覽on.cc《放榜無限分2009》

直擊人類豬流感最新疫情
詳情瀏覽on.cc《奪命流感》