捧師妹麥家碧場

呢班平日喺議事堂一本正經嘅議員，原來都有輕鬆活潑嘅一面。好似葉偉明咁，原來好熟悉香港漫畫史。佢話以前有財叔，六、七十年代就有老夫子，八、九十年代輪到麥嘜同麥兜，仲話兩隻小豬反映咗香港經濟增長時期嘅境況。葉偉明又大爆大學畢業時，朋友送咗個戴四方帽嘅麥兜毛公仔畀佢，果然係麥兜嘅「粉絲」。

鍾意麥兜嘅又點止葉偉明，連參與過《史力加》、《功夫熊貓》製作嘅港產荷里活動畫師許誠毅都話愛上麥兜。依家忙緊《史力加４》嘅許誠毅趁放假返香港兩個星期，特登嚟捧同屬理工大學畢業嘅麥家碧師妹場，麥家碧正係《麥兜响噹噹》嘅作者。細個鍾意睇《鐵甲萬能俠》、《巴別二世》嘅許誠毅，鍾意麥兜嘅香港情懷，令遠在美國嘅佢睇得特別窩心，仲話唔少移民去美國嘅香港人，都特登買麥兜畀小朋友睇。

陳淑莊就話中四時已經迷上麥兜，試過上堂時將本書放喺大髀上面睇，但佢功力深厚，從未試過被老師發現。

不過麥家碧話，麥兜一啲都唔蠢，只係單純、簡單，希望咩都講求效率、進步嘅現代人，睇完有所反思，尋回小時候學過嘅美德。

卓妮