本文重點
政府高官排住隊放暑假，好多都將近回巢工作，但運輸及房屋局局長鄭汝樺（Eva）今個周末（十五日）才趕搭尾班車放兩星期大假，與丈夫及兩個囡囡飛去北海道玩自駕遊，欣賞夏天盛放嘅花海之餘，仲大歎地道美食。Eva之所以咁遲放假，係因為要等埋兩個囡囡分別完成暑期工作及暑期課程後才起行，真係廿四孝媽咪。
四口家輪流開車
卓妮早幾日遇到Eva着住好Sharp嘅紅色外套配埋條珍珠頸鏈，笑盈盈行去中國會食午飯，完全流露出準備放假嘅心情。Eva話，她與家人經常到日本旅遊，事關放幾日假容易安排，又多好嘢食，相當吸引。今次北海道自駕遊，Eva話一家四口會輪流開車，不像以往由丈夫獨力開車咁辛苦，同埋去到每個景點都會入住民宿。
Eva一向重視家庭，絕少讓家人曝光受騷擾，卓妮就搵到一張她一家四口在北美阿拉斯加騎馬樂融融嘅照片，睇落大女樣貌似佢多啲，細女就似爸爸。聽聞Eva兩個女都係修讀商科，大女正在美國讀大學，一年後畢業；細女就在本地大學升讀二年級，好快可以投身社會工作，Eva應該可以放下心頭大石。
卓妮