咦，咪住先，功夫茶係咪報舊料呀？環保署高官上鹹網已經唔係新聞咯喎，聽講鹹蟲已經被公務員事務局調離環保署，不過政府始終神神秘秘冇交代詳情，怕瘀皮啩。

大家唔好誤會，唔係舊料，而係新料。環保署再次被揭發有另一個高官喺辦公室上鹹網，亦即係話，鹹蟲有兩條！

不如咁啦，為免大家混淆不清產生誤會，之前嗰個高官姑且就叫鹹蟲甲，新嘅呢個稱為鹹蟲乙。鹹蟲甲未被調職之前原本係助理署長，鹹蟲乙家陣嘅職位係首席環境保護主任。

唔知係事有湊巧，定係臭味相投，鹹蟲甲同鹹蟲乙身處同一組別，擁有從屬關係，一個係上司，一個係下屬，名副其實上樑不正下樑歪。之不過咁，兩條友仔不務正業嘅方式有少少分別，鹹蟲甲係利用大部分返工時間上鹹網，高峰期每日六粒鐘，而鹹蟲乙係放咗工之後留喺辦公室，「加班」瀏覽色情網頁。

講番鹹蟲甲吖，呢個官場敗類都算把炮咯，成為醜聞主角之後不但死撐唔認錯，反而以精神健康作為理由狡辯。佢以十多頁紙回應政府，甚至搬出醫生證明，話佢喺嚴重工作壓力之下出現精神健康問題，所以先至會返工上鹹網「減壓」。

照咁講，功夫茶建議曾蔭權率領三司十二局集體上鹹網，鬼叫個個壓力咁大咩！

呢嗱嗱嗱，大家明白香港嘅環保工作點解咁廢啦。環保署高官偷懶已經係大逆不道，砌詞狡辯更加係荒謬絕倫，以佢哋咁嚴重偏低嘅智商，即使認認真真工作，睇怕都做唔到乜嘢成績。如果換轉係功夫茶，返工上鹹網嘅理由梗係唔係減壓咁幼稚啦，而係協助警方監察網上發放淫褻及不雅物品，順便打擊少女援交！

話時話，就當全人類都係傻瓜，信晒你上鹹網係為咗減壓，喂，減壓使唔使每日六粒鐘呀？你估政府辦公室係桑拿浴室，大部分時間係用嚟鬆弛神經？搵個技師幫你踩背好唔好？

真係唔知環境局局長邱騰華係點管理嘅，一方面容許香港空氣污染，一方面容許下屬鹹濕污染。功夫茶甚至思疑，成個環保署都烏煙瘴氣，仲有好多條鹹蟲未被揭發。

講真，食色性也，十三歲細路仔都要買個噴血模嘅人形攬枕返屋企陪瞓啦，高官鹹濕好正常啫。弊就弊在，返工做鹹蟲，等於做懶蟲，又見鹹蟲搞環保，藍天白雲渣都冇！

不如咁嘞，邱騰華捱義氣，私底下出錢送環保署員工一人一個人形攬枕，然後約法三章：只准歸家鹹豬手，不准返工上鹹網！