當然，隨着年紀、學識、智慧等的增長，閱人論世就不會那麼武斷，我們便會漸漸明白：世事有多繁複，人心就有多微妙；你看秦始皇就不會只見到他「焚書坑儒」的魔鬼形象，你看李斯亦可讀出他人性黑暗的一面。

不過，在香港竟有一個人，老朽一把年紀都畀佢弄糊塗了——怎麼「二元對立的判斷」係啱嘅？人，原來可以衰到貼地到咁嘅地步！此人——唔使估，大家都知道，佢叫鄧爾邦。

原來，香港有十二個民間團體組成代表團遠赴日內瓦，向聯合國會議提出控訴，皆因香港的《種族歧視條例》有多項缺陷，是以有團體負責人兩度約平機會主席鄧爾邦，商討有關少數族裔的教育、就業等問題，誰知佢一味耍太極，三個字「唔得閒」便把分內應做的事推得一乾二淨！

看官，呢啲行為就叫作「霸着茅坑不拉屎」！鄧爾邦搞到「平機會」嘅招牌變「大花筒」，佢老哥未經政府批准自把自為投保超豪人壽保險，出使公幹要坐商務客位，而且要住「大使套房」……儘管立法會帳目委員會對佢此等大花筒行徑表達「極度遺憾」，鄧爾邦卻臉不紅、氣不喘的回以「極度厚臉皮」，此臉皮正應了一種油漆的廣告歌詞：日曬雨淋水洗都不變！老朽深信，佢代理呢隻油漆，無敵矣！

講真，有鄧爾邦一日嘅「平機會」，只能是政府的恥辱。