許會長自爆中學時最愛攞住部相機幫同學仔影相，每逢學校舉行運動會、畢業禮，就會請纓出動私伙相機幫校長、老師及同學仔留倩影，相片珍藏至今。

不過講到最珍貴嘅照片，就係一張放喺佢荷包幾十年嘅黑白舊照，唔通係佢個舊情人？非也！相中人就係六十年前嘅許會長，張相係佢當年畢業照，話說當年十九歲嘅佢由潮州來港後，入讀當時位於鴨寮街嘅香港芝加哥無線電專科學校，學整收音機，科目屬當年最潮。可惜畢業後佢未有投身電子行業，而係跟隨爸爸從商，張畢業證書亦用唔着，索性將相片撕落嚟珍藏嘞。

講番個攝影比賽，由今日起至十一月二日接受報名，參賽者可以香港及內地人情風貌為題，影低作品參賽，得獎作品將於十二月初喺香港展出。