政府尋日向立法會提交最新一輪嘅問責高官利益申報資料，同去年同期比較，有兩名局長都減持咗手上嘅物業，似乎對最近嘅樓市小陽春冇乜信心。其中財經事務及庫務局局長陳家強賣咗一層位於澳門嘅自用度假物業。喺年前本地樓市大跌時趁低增持咗一個中西區住宅物業嘅政制及內地事務局局長林瑞麟，最近又係賣咗一個同區嘅住宅物業，不過就唔知係咪同一間，如果係就肯定賺咗唔少。
林D9一方面減持住宅單位，另一方面就不斷吸納優質車位自用同出租，喺過去一年已先後增持咗三個，兩個位於佢自己居住嘅南區，一個位於中西區。可能佢係見依家息口低迷，買車位有租收又有升值潛力喇！
尋日第一日返新工嘅特首辦主任譚志源，就申報只得一間同太太各佔一半嘅中西區自住單位，好明顯佢做咗林D9副手成年，都學唔到對方嘅投資之道。勞工及福利局局長張建宗喺再上一個年度樓市高位時，減持咗一層物業獲利，過去一年雖然冇買樓亦冇賣樓，但仍然以八個分別位於中西區同東區嘅物業，蟬聯「高官樓王」。