理大榮休校長潘宗光主政理大十八年，經佢手籌得嘅捐款高達二十五億元，把口咁掂，唔做推銷員嘥晒。潘校長放下教鞭七個月，最近有新動向，呂志和向佢招手，入嘉華國際擔任獨立非執行董事，轉型踏足商界。
潘宗光八十年代擔任立法局議員時已經認識嘉華國際主席呂志和，潘做理大校長，出名「揼心口」能力高，呂志和往往唔托手(月爭)，好似○四年捐出近四百萬元設遙距康復治療中心、○六年捐一千四百萬元支持理大酒店及旅遊業管理學院咁，最難得係，上年金融海嘯，呂志和仍然豪擲三千萬元捐畀理大，當係送畀潘宗光做退休禮物，認真唔話得。
潘宗光做校長時，呂志和咁撐佢，依家退咗休，潘宗光又答應加入嘉華國際做獨立非執董，兩個人有咁長遠嘅關係，無論係乜嘢職位，都可以維繫落去喇。
另外，嘉華國際今次亦搵埋「公職王」鄭慕智出任非執行董事，鄭依家已經係中國遠洋同中國移動約十間大企業嘅獨立非執董或非執董，睇嚟佢唔止公職多，私人瓣數一樣百足咁多爪。