本文重點
年輕人如果想成為社會堅固嘅棟樑，一定要先向成功嘅前輩學習。尋日在港內地畢業生聯合會就搞咗個論壇，身為名譽主席嘅全國人大常委會基本法委員會副主任梁愛詩同行政會議召集人梁振英都有出席，同場仲請嚟恒隆地產董事長陳啟宗（Ronnie）同城市大學校長郭位，卓妮同幾十個兩岸三地嘅大學生一齊，去到科學園吸取前輩嘅智慧。
Ronnie演講時話，面向國際化係推動國家進步嘅重要環節，年輕人嘅視野要同世界接軌。點先叫做到國際化呢？Ronnie用自己去美國留學嘅經歷做例子，話當時為咗深入了解美國文化，堅決實行「三不政策」：不到唐人街、不吃中國餐、不識中國人做女朋友。就係因為融入咗落美國社會，令佢好快就明白當地嘅社會文化。
郭位推崇學以致用
不過Ronnie又教學生唔好立亂跟風，原來佢喺美國讀大學嗰陣好興嬉皮士，但全班就得佢一個唔跟風，唔留長髮，堅持日日沖涼同着鞋出街。嗰陣可能會有人覺得佢老土，但最終呢班嬉皮士為保飯碗都要放棄嬉皮，證明Ronnie當日嘅堅持正確。
郭校長就同同學分享學以致用嘅重要性。佢話學與用係相輔相成，大家唔需要執着有無一個博士學位，因為佢認識好多好有成就但係無學位嘅人，最重要係要將所學用番出嚟。郭校長認為就算將所有嘢攤晒出嚟，學位、語文、溝通等，都唔夠一個人言之有物咁緊要喎！
卓妮