本文重點
今個夏天，書展同動漫節都畀o靚模搞到淪陷咗，書展嘅噴血寫真集賣個滿堂紅，一眾男粉絲為之瘋狂，連十幾歲小男生都爭住睇。之後舉行嘅動漫節，亦有十幾歲小男生省吃儉用，寧願食少啲都要慳飯錢買番個o靚模人形攬枕返屋企攬住瞓。
話反映香港多元化
不過，o靚模唔係無敵嘅，書展同動漫節都喺會展舉行，但係會展場主——貿易發展局主席蘇澤光（Jack）就完全不為所動。
雖然今年兩個活動，會展都旺丁又旺財，不過Jack就對o靚模們零興趣。早兩日卓妮喺中環香港會遇見佢去食飯，佢好認同今年書展同動漫節搞得唔錯，但係原來除咗開幕之外，佢都無再落過去巡場。對於班o靚模咁受大家歡迎，Jack就覺得呢個情況可以反映出香港嘅多元化，講得不知幾大體，方方面面都唔得罪。
不過當卓妮問佢有無留意班o靚模，佢就好坦白咁話︰「無咩留意呀！」事實證明，呢班搞到電車男、龍友同青年人瘋狂嘅o靚模，扭晒蛇腰都無辦法吸引到蘇主席嘅青睞。
卓妮